ଚାରଣ ସମ୍ବାଦ

 

ଚାରଣ ଗୋଷ୍ଠୀ ତରଫରୁ ଜନ୍ମାଷ୍ଟମୀ ଉତ୍ସବ ପାଳିତ

ପୁରୀ ୩୦/୮: ଆନ୍ତର୍ଜାତୀୟ ଚାରଣଗୋଷ୍ଠୀ, ପୁରୀର ରାଜ୍ୟରେ ଓ ରାଜ୍ୟ ବାହାରେ ଥିବା ଅଧିକାଂଶ ଶାଖାରେ ତା ୩୦/୮/୨୦୨୧ରିଖ ଜନ୍ମାଷ୍ଟମୀ ଅବସରରେ ବହୁସଂଖ୍ୟାରେ ଚାରଣମାନେ ଯୋଗ ଦେଇ ସହସ୍ରାର୍ଚ୍ଚନ, ବିଷ୍ଣୁ ସହସ୍ରନାମ ଓ ଶ୍ରୀମଦ ଭାଗବତ ଦଶମ ସ୍କନ୍ଦ ୧ମ ଅଧ୍ୟାୟ ଠାରୁ ୪ର୍ଥ ପର୍ଯ୍ୟନ୍ତ ପାଠକରି ଆଡ଼ମ୍ବରପୂର୍ଣ୍ଣ ଉତ୍ସବ ମନାଇଛନ୍ତି । 

ସେଥିପାଇଁ ଆୟୋଜକ ମାନଙ୍କୁ ଦଳପତି ପ୍ରାଧ୍ୟାପକ ଡା.ଗୋପାଳ ଚନ୍ଦ୍ର ରଥ ପ୍ରମୁଖ କେନ୍ଦ୍ରୀୟ କର୍ମକର୍ତ୍ତାମାନେ ଧନ୍ୟବାଦ ଅର୍ପଣ କରିଛନ୍ତି ।

ପୁରୀ ଜିଲ୍ଲା ସଂଗଠନର ସାଂଗଠନିକ ବୈଠକ

ପୁରୀ ୨୮/୮: ନନ୍ଦୋତ୍ସବ ଦିନ ପ୍ରଥମ କରି ପୁରୀ ଜିଲ୍ଲା ସଂଗଠନର ଏକ ବୈଠକ ଆନ୍ତର୍ଜାତୀୟ ଚାରଣଗୋଷ୍ଠୀ ମୁଖ୍ୟ କାର୍ଯ୍ୟାଳୟରେ ଅନୁଷ୍ଠିତ ହୋଇଥିଲା । ଏଥିରେ ପୁରୀ ଜିଲ୍ଲାର ସମସ୍ତ ମଣ୍ଡଳ, ଅଞ୍ଚଳ, ଜିଲ୍ଲା ସଂଗଠକ ଓ କେନ୍ଦ୍ରୀୟ କର୍ମକର୍ତ୍ତାମାନେ ଯୋଗ ଦେଇଥିଲେ । ଜିଲ୍ଲାରେ ଚାରଣ ସଂଗଠନକୁ ବ୍ୟାପକ କରିବା ପାଇଁ ଆଲୋଚନା ହେଲା । ଜିଲ୍ଲାର ପୁରୀ ସଦର, ବ୍ରହ୍ମଗିରୀ, କଣାସ, ଡେଲାଙ୍ଗ, ସାକ୍ଷୀ ଗୋପାଳ, ପିପିଲି, ଅସ୍ତରଙ୍ଗ, କାକଟପୁର, ନିମାପଡ଼ା, ଗୋପ ଓ କୃଷ୍ଣ ପ୍ରସାଦ(ପାରିକୁଦ ଚିଲିକା) ବ୍ଳକରେ ଅତିକମରେ ଗୋଟିଏ ଗୋଟିଏ ଶାଖା ଖୋଲିବାକୁ ସ୍ଥିର ହୋଇଥିଲା । ସମସ୍ତ ସଂଗଠକ ନିଜ ହାତରୁ ଖର୍ଚ୍ଚକରି ସଂଗଠନ କରିବାକୁ ପ୍ରତିଶୃତି ଦେଇଥିଲେ । ସମସ୍ତଙ୍କୁ କେନ୍ଦ୍ରୀୟ ସଂପାଦକ ଧନ୍ୟବାଦ ଦେଇଥିଲେ ।

ବାହାରିପୁରରେ ନୂତନ ଚାରଣ ଶାଖା ଗଠିତ

ହାଟଡ଼ିହି ୨୮/୮: ଜଗନ୍ନାଥ ମହାପ୍ରଭୁଙ୍କ ଅପାର କରୁଣାରୁ ଆନ୍ତର୍ଜାତୀୟ ଚାରଣଗୋଷ୍ଠୀ ପୁରୀ ତରଫରୁ କେନ୍ଦୁଝର ଜିଲ୍ଲା ହାଟଡ଼ିହି ବ୍ଳକ ସମଣା ପଂଚାୟତ ବାହାରିପୁର ଗ୍ରାମରେ ଏକ ଚାରଣ ଶାଖା ଗଠନ କରାଯାଇଛି । ଲକ୍ଷ୍ମୀନାରାୟଣ ମନ୍ଦିର ପରିସରରେ ଚାରଣ ଗୋଷ୍ଠୀ ପକ୍ଷରୁ ସତ୍ସଙ୍ଗ ଅନୁଷ୍ଠିତ ହୋଇଥିଲା । ବିଷ୍ଣୁ ସହସ୍ରନାମ, ପଞ୍ଚଦଶ ଅଧ୍ୟାୟ, ହନୁମାନ ଚାଳିଶା ଆଦି ପାଠ କରାଯାଇଥିଲା । ଜଗନ୍ନାଥ ଚେତନାର ପ୍ରଚାର ଓ ସୁସ୍ଥ ସମାଜ ଗଠନ ଲକ୍ଷ୍ୟରେ ଚାରଣଗୋଷ୍ଠୀ ତରଫରୁ ଏଭଳି କାର୍ଯ୍ୟକ୍ରମ ଆୟୋଜନ କରାଯାଉଛି । ଏହି କାର୍ଯ୍ୟକ୍ରମରେ ଶାଳଦେଇ ଚାରଣ ଶାଖାରୁ ନବଘନ ରାଉତ, କୋଦମ୍ବଡ଼ିହି ଶାଖାରୁ ତପନ କୁମାର ନାୟକ, ରାମଚନ୍ଦ୍ର ନାୟକ, ମଙ୍ଗରାଜପୁରରୁ ବ୍ରଜବନ୍ଧୁ ପରିଡ଼ା ଉପସ୍ଥିତ ଥିଲେ । କାର୍ଯ୍ୟକ୍ରମଟିକୁ ନାରାୟଣ ସ୍ୱାଇଁ, ମଦନମୋହନ ବିଶ୍ୱାଳ, ବାଇଧର ସ୍ୱାଇଁ, ଗୋଲାପ ସାହୁ, ଶ୍ୟାମସୁନ୍ଦର ସାହୁ, ଦାମୋଦର ସାହୁ, ମଣି ସାହୁ, ଦୀନବନ୍ଧୁ ସା ପ୍ରମୁଖ ପରିଚାଳନା କରିଥିଲେ ।

ଚାରଣ ସଂଗଠକ ସମ୍ମିଳନୀ-୨୦୨୧

ସ୍ଥାନ-ମୁଖ୍ୟ କାର୍ଯ୍ୟାଳୟ,                                                 ପୁରୀ ଦିନାଙ୍କ-୨୭/୦୮/୨୦୨୧

ଜୟ ଜଗନ୍ନଥ । ମହାପ୍ରଭୁ ଜଗନ୍ନାଥଙ୍କ କୃପାରୁ ଆନ୍ତର୍ଜାତୀୟ ଚାରଣଗୋଷ୍ଠୀ, ପୁରୀ ତରଫରୁ ମଣ୍ଡଳ ସଂଗଠନ, ଅଞ୍ଚଳ ସଂଗଠନ, ଜିଲ୍ଲା ସଂଗଠନ ଓ କେନ୍ଦ୍ରୀୟ ସଂଗଠନର କର୍ମକର୍ତ୍ତାମାନଙ୍କର ଏକ ବୈଠକ ଶ୍ରୀକ୍ଷେତ୍ର ପୁରୀସ୍ଥ ଗୋଷ୍ଠୀର ନିଜ ମୁଖ୍ୟାଳୟର ସଭାଗୃହରେ ତା୨୭/୮/୨୦୨୧ରିଖରେ ଅନୁଷ୍ଠିତ ହୋଇ ଯାଇଛି । 

ଦଳପତି ପ୍ରାଧ୍ୟାପକ ଡା. ଗୋପାଳ ଚନ୍ଦ୍ର ରଥଙ୍କ ପୌରୋହିତ୍ୟରେ ଉଦ୍ଘାଟିତ ଏହି ବୈଠକ ମହାପ୍ରଭୁଙ୍କ ଆଜ୍ଞାମାଳର ପୂଜନରୁ ଆରମ୍ଭ ହୋଇଥିଲା । ପ୍ରଥମେ ଦଳପତି ମୁଖ୍ୟାଳୟରେ ପ୍ରତିଷ୍ଠିତ ମହାପ୍ରଭୁଙ୍କର ପୂଜାର୍ଚ୍ଚନା କରିବା ପରେ ଆଜ୍ଞାମାଳଙ୍କର ଆରତି କରିଥିଲେ । ତାପରେ ‘ଶ୍ରୀକୃଷ୍ଣ ଗୋବିନ୍ଦ ହରେ ମୁରାରେ’ ସାମୁହିକ ଉଚ୍ଚାରଣ ପୂର୍ବକ ଚାରଣୀୟ ଧ୍ୱନିରେ ବୈଠକର ଅୟମାରମ୍ଭ ହୋଇଥିଲା । ବୈଠକରେ ଗଜପତି ମହାରାଜାଙ୍କ ରାଜଗୁରୁ ସୁଧାଂଶୁ ଶେଖର ରାଜଗୁରୁ ଅତିଥିଭାବେ ଯୋଗ ଦେଇଥିଲେ ।

ଦଳପତିଙ୍କ ନିର୍ଦ୍ଦେଶରେ ସଂପାଦକ ଶ୍ରୀଯୁକ୍ତ ଗୋବିନ୍ଦ ଚନ୍ଦ୍ର ବେହେରା ପୂର୍ବ ବୈଠକର ବିବରଣୀ ପାଠ କରିଥିଲେ ଯାହାକୁ ଉପସ୍ଥିତ ସମସ୍ତ ଚାରଣମାନେ କରତାଳି ଦ୍ୱାରା ଗୃହିତ କରିଥିଲେ । ଦଳପତି ଶ୍ରୀ ରାଜଗୁରୁଙ୍କୁ ସମ୍ବର୍ଦ୍ଧିତ କରିଥିଲେ । ଆନ୍ତର୍ଜାତୀୟ ଚାରଣଗୋଷ୍ଠୀ, ପୁରୀ ଦ୍ୱାରା ପ୍ରକାଶିତ ତଥା ଗୋଷ୍ଠୀର ଯୁଗ୍ମ ସଂପାଦକ କବି ତିଳକ ସୁରେଶ ଚନ୍ଦ୍ର ବରାଡ଼ଙ୍କ ଦ୍ୱାରା ଲିଖିତ ନୀଳାଚଳ କ୍ଷେତ୍ର ମହାତ୍ମ୍ୟ(କପିଳ ସଂହିତା) ପୁସ୍ତକକୁ ମଞ୍ଚାସୀନ ଅତିଥିଗଣ ଉନ୍ମୋଚନ କରିଥିଲେ । 

ଉପଦଳପତି ଡ. ଶରତ ଚନ୍ଦ୍ର ପାତ୍ର ଶ୍ରୀ ବରାଡ଼ଙ୍କୁ ସମ୍ବର୍ଦ୍ଧିତ କରିଥିଲେ । ନୂତନ ଭାବରେ ବିଭିନ୍ନ ପଦପଦବୀ ଗ୍ରହଣ କରିଥିବା ଚାରଣମାନଙ୍କର ପରିଚୟ ପର୍ବ ତାହା ପରେ ଅନୁଷ୍ଠିତ ହୋଇଥିଲା । 

ସଂପାଦକ ସମସ୍ତଙ୍କର ନାମ ପଢ଼ି ପରିଚୟ କରାଇଥିଲେ । ଚାରଣ ମୁଖ୍ୟାଳୟସ୍ଥ ଆବାସରେ ରହିବା ଏବଂ ତୃତୀୟ ମହଲାରେ ଏକକ ରହଣୀ ଗୃହ ନିର୍ମାଣର ନିୟମମାନ ଦଳପତି ପଠନ କରିଥିଲେ ଆଲୋଚନା ପରେ ଉକ୍ତ ପ୍ରସ୍ତବକୁ ମଧ୍ୟ ଗ୍ରହଣ କରାଯାଇଥିଲା । ଶ୍ରୀଯୁକ୍ତ ଇନ୍ଦ୍ରମଣି ମହାନ୍ତି, ଶ୍ରୀଯୁକ୍ତ ପଞ୍ଚାନନ ସ୍ୱାଇଁ,

ଶ୍ରୀଯୁକ୍ତ ଶୁଭେନ୍ଦୁ ଶେଖର ସ୍ୱାଇଁ ପ୍ରମୁଖ ତୃତୀୟ ମହଲା ନିର୍ମାଣ ନିମନ୍ତେ ଅର୍ଥରାଶି ପ୍ରଦାନ କରିବେ ବୋଲି ପ୍ରତିଶୃତି ଦେଇଥିଲେ ।
ଶେଷରେ ଚାରଣମାନଙ୍କ ଦ୍ୱାରା ମହାପ୍ରଭୁଙ୍କର ଜୟ ଜୟକାର ଶବ୍ଦରେ ଗଗନ ପବନ ମୁଖରିତ ହେବା ସହିତ ସଭା ସାଙ୍ଗ ହେବାର ନିର୍ଦ୍ଦେଶ ଦଳପତି ପ୍ରଦାନ କରିଥିଲେ । ସମସ୍ତ ଚାରଣ ମହାପ୍ରସାଦ ସେବନ କରିଥିଲେ ।

 

ଚାରଣଗୋଷ୍ଠୀ ତରଫରୁ ବଳଦେବ ଜୟନ୍ତୀ ପାଳିତ

କଳିଙ୍ଗ ନଗର ୨୩/୮:ଆନ୍ତର୍ଜାତୀୟ ଚାରଣଗୋଷ୍ଠୀ ପୁରୀର ବାଳୁଙ୍ଗାବନ୍ଦି, ଯଖପୁରା ଓ ରାବଣା ଶାଖାର ଚାରଣ ଭାଇ ଭଉଣୀ ମାନେ ମିଳିତ ଭାବରେ ରାକ୍ଷୀ ପୂର୍ଣ୍ଣିମା ଅବସରରେ ପବିତ୍ର ବଳଦେବ ଜୟନ୍ତୀ ବାଳୁଙ୍ଗାବନ୍ଦିର ବଗେଇ ମନ୍ଦିର ପ୍ରାଙ୍ଗଣରେ ମହାସମାରୋହରେ ପାଳନ କରିଥିଲେ । ବିଷ୍ଣୁ ସହସ୍ରନାମ, ହନୁମାନ ଚାଳିଶା ପାଠ କରି ବିଶ୍ୱରୁ କରୋନା ମହାମାରୀ ଦୂର ହେଉ ବୋଲି ଜଗନ୍ନାଥଙ୍କୁ ଗୁହାରୀ ଜଣାଇଥିଲେ । ବାଳୁଙ୍ଗାବନ୍ଦି ଚାରଣ ଶାଖାର ଦଳପତି ଗଣେଶ୍ୱର ବେହେରା, ଉଦୟ ରାଉତ ଓ ଯଖପୁରା ଶାଖାର ରଘୁନାଥ ନାୟକ ଓ ଶରତ ସାମଲଙ୍କ ସହିତ ରାବଣା ଶାଖାର ଦଳପତି ଅଲେଖ କାଣ୍ଡି ଓ ଦୁଷ୍ମନ୍ତ ମାଝି ସମେତ ଆଖପାଖ ଚାରଣ ଶାଖାର ଚାରଣମାନେ ଯୋଗ ଦେଇଥିଲେ ।

ଚାରଣ ଗୋଷ୍ଠୀ ତରଫରୁ ସାଂଗଠନିକ ବୈଠକ

ହାଟଡ଼ିହି ୧୬/୮:ଆନ୍ତର୍ଜାତୀୟ ଚାରଣଗୋଷ୍ଠୀ ପୁରୀର ନୀତି ନିୟମକୁ ଆଧାରକରି ସର୍ବୋପରି ଦଳପତି, ଉପଦଳପତି ଓ ସମ୍ପାଦକଙ୍କ ନିର୍ଦ୍ଦେଶରେ କେନ୍ଦ୍ରୀୟ ସଂଗଠକ ଭରତ ଭାଇ ଏବଂ ଜିଲ୍ଲା ସଂଗଠକ ନବଭାଇଙ୍କ ପ୍ରେରଣାରେ ହାଟଡ଼ିହି ବ୍ଲକ ଶାଳଣିଆଁ ପଞ୍ଚାୟତର ବ୍ରାହ୍ମଣୀକଳା ଲକ୍ଷ୍ମୀନାରାୟଣ ମନ୍ଦିର ପ୍ରାଙ୍ଗଣରେ ଚାରଣଗୋଷ୍ଠୀ ପକ୍ଷରୁ ସତ୍ସଙ୍ଗ ଅନୁଷ୍ଠିତ ହୋଇଯାଇଛି । ସର୍ବପ୍ରଥମେ ବିଷ୍ଣୁ ସହସ୍ରନାମ, ଗୀତାର ପୁରୁଷୋତ୍ତମ ଯୋଗ, ହନୁମାନ ଚାଳିଶା, ଭାଗବତ ପାରାୟଣ ହୋଇଥିଲା । ଜଗନ୍ନାଥ ଚେତନା ଏବଂ ସୁସ୍ଥ ସମାଜ ଗଠନ ଲକ୍ଷ୍ୟରେ ଚାରଣ ଗୋଷ୍ଠୀ ପକ୍ଷରୁ ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ କାର୍ଯ୍ୟକ୍ରମ ମାନ ଆୟୋଜନ କରାଯାଉଛି । ଏଥିପାଇଁ ବ୍ରାହ୍ଣଣୀକଳା ଗ୍ରାମରେ ଏକ ଚାରଣ ଗୋଷ୍ଠୀ ଗଠନ କରାଯାଇଥିଲା । କଦମ୍ବଡ଼ିହୀ ଚାରଣଶାଖାର ତପନ କୁମାର ନାୟକ, ମତାବାଜ ଚାରଣ ଶାଖାର ସୁରେନ୍ଦ୍ର ଭାଇ, ମଙ୍ଗରାଜପୁର ଚାରଣ ଶାଖାର ବ୍ରଜଭାଇ ପ୍ରମୁଖ ଉପସ୍ଥିତ ହୋଇ ଏହି ଶାଖା ଗଠନ କରିଥିଲେ ।

ସେହିପରି ଜଳସରପୁର ଗ୍ରାମରେ ମଧ୍ୟ ଏକ ଚାରଣ ଶାଖା ଗଠନ କରାଯାଇଛି । ଗ୍ରାମର ଅବସରପ୍ରାପ୍ତ ଶିକ୍ଷକ ବାସୁଦେବ ନାୟକ, ଚକ୍ରଧର ଜେନା, ବଳରାମ ଧଳଙ୍କ ସହିତ ଅନେକ ଗ୍ରାମବାସୀ ଏହି ଗୋଷ୍ଠୀରେ ସାମିଲ ହୋଇଛନ୍ତି ।